ფოთში, ჭავჭავაძის ქუჩის მცხოვრებლები საპროტესტო აქცია მართავენ. მათ საავტომობილო გზა გადაკეტეს.
აქციის მონაწილეები „კავკასიური მეტალის ტერმინალის“ მიმართ პრეტენზიებს გამოთქვამენ.
ადგილობრივების ინფორმაციით, აღნიშნული ტერმინალი სპილენძის კონცენტრატის და ძვირფასი ლითონის იმპორტ- ექსპორტს ახორციელებს და მუშაობის პროცესში წარმოქმნილი მტვერი და სუნი მათ ჯანმრთელობას საფრთხეს უქმნის.
მათივე თქმით, პრობლემა მძიმე სატვირთო ავტომანქანების გადაადგილებით გამოწვეული ხმაურიცაა.
„აქ ცხოვრება უკვე გაუსაძლისია. ამ ტერმინალიდან საშინელი მტვერი იფრქვევა, რაც ჩვენი ჯანმრთელობისთვის საზიანოა. აქედან გაგვასახლონ. ამ ქუჩაზე მუდმივად მძიმეწონიანი სატვირთო მანქანები გადაადგილდება და საშინელი ხმაურია. ფანჯრების გაღების საშუალებაც კი არ გვაქვს“, - განუცხადა ჟურნალისტებს აქციის ერთ-ერთმა მონაწილე მაია ადეიშვილმა.
აქციის მონაწილეები დაშლას არ აპირებენ, ვიდრე მათი მოთხოვნა არ დაკმაყოფოლდება.
"კავკასიური მეტალის ტერმინალის" იურისტის, გიორგი ყოფურიას თქმით, საწარმო სტანდარტების შესაბამისად მუშაობს.