რუსთავის მერი ირაკლი ტაბაღუა, მერიის შესაბამისი სამსახურის ხელმძღვანელებთან ერთად, სუმგაითელი მეტალურგების ქუჩის მოსახლეობას შეხვდა.
როგორც „ინტერპრესნიუსს“ რუსთავის მერიიდან აცნობეს, ირაკლი ტაბაღუამ მოსახლეობას აღნიშნულ ქუჩაზე, ავტოტრანსპორტის მოძრაობის ახალი სქემა გააცნო.
„სუმგაითელი მეტალურგების ქუჩაზე, საავტომობილო მოძრაობის განტვირთვის თხოვნით, ირაკლი ტაბაღუას მოსახლეობამ მიმართა. ადგილობრივების თქმით, ქუჩის ამ მონაკვეთზე საცხოვრებელი სახლები ავარიულია და სატრანსპორტო საშუალებების დიდი ნაკადის პირობებში, ნგრევის საფრთხე დღითიდღე იზრდება.
მათივე ინფორმაციით, მოსახლეობისთვის წარდგენილი პროექტი კიდევ ერთხელ დამუშავდება და მხოლოდ მას შემდეგ განხორციელდება, რაც მისი განხილვა სპეციალისტებთან და მოსახლეობის სხვადასხვა ჯგუფთან მოხდება”, - აღნიშნულია ინფორმაციაში.