"არ გვჭირდება ცათამბჯენები", "შეწყდეს ბეტონყმობა“, - ამ ლოზუნგებით ბათუმში არასამთავრობო ორგანიზაციების წარმომადგენლები და რიგითი ბათუმელები საპროტესტო აქციას მართავენ. შეკრებილების განცხადებით, ისინი ძველ ბათუმში, ისტორიულ უბნებში მიმდინარე მშენებლობებს აპროტესტებენ. აქციის მონაწილეები მიიჩნევენ, რომ ისტორულ საზღვრებში მშენებლობა ქალაქის სიცოცხლეს სპობს და ხელისუფოებას მკაცრ რეაგირებას სთხოვენ.

"ვაპროტესტებთ უსისტემო, ყოველგვარი კანონისა და რეგულაციების გვერდის ავლით ქალაქის ე.წ. განვითარებას. ხელისუფლებისგან ძალიან ბევრი დაპირებაა, რომ ეს პროცესი უფრო გაღრმავდება... შესაბამისად, საზოგადოებაში არის დაგროვილი ეს პროტესტი დიდი ხანია და დღეს საჯაროდ ვაპროტესტებთ... მეცნიერული კვლევის შედეგად დადგინდა ბათუმის ისტორული საზღვრები. კვლევა დიდი ხნის განმავლობაში მიმდინარეობდა და შევთანხმდით, რომ ეს ზონა დაცული უნდა ყოფილიყო. აღნიშნულ ტერიტორიაზე ცათამბჯენების მშენებლობა არ შეიძლებოდა. სულ რაღაც ერთი კვირის წინ აღმოვაჩინეთ, რომ ძველი ბათუმის ტერიტორიაზე იგეგმება მშენებლობები, რაც კონკრეტული მენაშენის ინტერესებს მოიცავს და ქალაქის სიცოცხლის უფლებას აზიანებს", - განაცხადა შოთა გუჯაბიძემ.