თელავში, 40 წლამდე მამაკაცმა დენის დარტყმის შედეგად ძლიერი დამწვრობა მიიღო. შემთხვევა სასტუმრო „ინტურისტის" შენობაში მოხდა, სადაც დემონტაჟი მიმდინარეობს. მამაკაცი თავდაპირველად თელავის რეფერალურ საავადმყოფოში მოათავსეს, სადაც პირველადი დახმარება გაეწია.

ექიმის ინფორმაციით, პაციენტს ძირითადად დაზიანებები სახის არეში აქვს მიღებული. ჯანმრთელობის მდგომარეობის სირთულიდან გამომდინარე, დაშავებული თბილისში, დამწვრობის ცენტრში გადმოიყვანეს.

მომხდარზე გამოძიება სისხლის სამართლის კოდექსის 240-ე მუხლით დაიწყო, რაც სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს.