აჭარის ავტონომიური რესპუბლიკის უმაღლესი საბჭოს თავმჯდომარე დავით გაბაიძე, ბათუმის სახელმწიფო მუსიკალურ ცენტრში, ქართულ-აფხაზური ოჯახების საღამოს დაესწრო.

როგორც „ინტერპრესნიუსს“ აჭარის ავტონომიური რესპუბლიკის უმაღლესი საბჭოდან აცნობეს, აჭარის უმაღლესი საბჭოს თავმჯდომარემ დავით გაბაიძემ, აჭარის მთავრობის თავმჯდომარემ თორნიკე რიჟვაძემ, აფხაზეთის ხელისუფლების წარმომადგენლებმა: გია გვაზავამ, ვახტანგ ყოლბაიამ, სოროპტიმისტ ქალთა კლუბის „ბათუმის“ ხელმძღვანელმა ნათელა დუმბაძემ საუკუნეების მანძილზე ქართველთა და აფხაზთა თანაცხოვრებისა და ძმათა შორის ჩატეხილი ხიდის აღდგენის მნიშვნელობაზე ისაუბრეს. შეკრებილ საზოგადოებას საშუალება ჰქონდა დაეთვალიერებინა ქართველი და აფხაზი მხატვრების ნამუშევრების, მწერლების წიგნების გამოფენა.

გაიმართა სპექტაკლი - „აფხაზეთო, მე უშენოდ მზეც ობოლი მგონია“, რომელმაც შეკრებილებს კიდევ ერთხელ შეახსენა, თუ რაოდენ მნიშვნელოვანია ქართულ-აფხაზურ ურთიერთობები.

საღამო სოროპტიმისტ ინტერნაციონალის კლუბის - „ბათუმის“ , საქართველოს მეცნიერებათა ეროვნული აკადემიის აჭარის რეგიონული სამეცნიერო ცენტრისა და აფხაზეთის მეცნიერებათა ეროვნული აკადემიის ორგანიზებით გაიმართა.