თელავში, ცენტრალური მოედნის მიმდებარე ტერიტორიაზე, გარემოვაჭრეები აქციას მართავენ. მათი თქმით, ქალაქის მერიის ზედამხედველობის სამსახურის წარმომადგენლები ვაჭრობის უფლებას არ აძლევენ, შეთავაზებული ალტერნატიული ფართი კი მათთვის მიუღებელია.
აქციის მონაწილების თქმით, ერეკლეობის დღესასწაულთან დაკავშირებით სხვადასხვა ქალაქებიდან ჩამოვიდნენ, თუმცა მერია ხალხმრავალ ადგილზე ვაჭრობის უფლებას არ აძლევს.
„სადაც ვაჭრობის ნება დაგვრთეს, იქ ხალხი არ დადის. ჩვენ კიდევ სხვადასხვა ქალაქებიდან მოვედით, რომ ორი თეთრი ვიშოვოთ, სახლში შვილები გველოდებიან", - განაცხადა ირმა გვენეტაძემ.
აქციის მონაწილეებს მერიაში უპასუხეს. ზედამხედველობის სამსახურის უფროსმა ლევან ბერძენაშვილმა განაცხადა, რომ მერიის მიერ გარემოვაჭრეობის შესახებ მიღებულია დადგენილება და შესაბამისად, იმ ტერიტორიაზე აკრძალვას კანონიერების ფარგლებში ახორციელებს.