სიღნაღის მუნიციპალიტეტის სოფელ ქვემო ბოდბეში „ევროპული საქართველოს" წევრს თავს დაესხნენ, - ამის შესახებ „ინტერპრესნიუსს“ პარტიის კახეთის რეგიონალური ორგანიზაციის ხელმძღვანელმა, გიორგი ღვინიაშვილმა განუცხადა.
მისივე ინფორმაციით, ბესიკ ლაზარიაშვილს ღამით ქუჩაში უცნობი პირები დაესხნენ თავს და პარტიის დატოვება მოსთხოვეს.
„მას სთხოვდნენ პოლიტიკური აქტივობების შეწყვეტას. მიაყენეს ფიზიკური და სიტყვიერი შეურაცხყოფა", - განაცხადა გიორგი ღვინიაშვილმა.
„ევროპული საქართველო“ მომხდარზე პასუხისმგებლობას მმართველ გუნდს აკისრებს.
სიღნაღის პოლიციაში „ევროპული საქართველოს“ წევრის, ბესიკ ლაზარიაშვილის გამოკითხვა მიმდინარეობს.
შსს-ს ინფორმაციით, მომხდარ ფაქტთან დაკავშირებით, გამოძიება 126-ე, ძალადობის მუხლით დაიწყო.