ბათუმის შოთა რუსთაველის სახელმწიფო უნივერსიტეტის სტუდენტებმა 2007 წლის 8 ნოემბერს, სტუდენტების დარბევის ფაქტის გამოძიება და დამნაშავე პირების დასჯა მოითხოვეს. ბათუმის შოთა რუსთაველის სახელმწიფო უნივერსიტეტში გამართულ შეხვედრაზე 11 წლის წინ განვითარებული მოვლენების ამსახველი კადრები აჩვენეს, სადაც სასწავლებელში სპეცრაზმის შეჭრა იყო ასახული.
უნივერსიტეტის რექტორის მერაბ ხალვაშის განცხადებით, გამოძიება გრძელდება და ყველა პირი დაკითხულია. მერაბ ხალვაში მომხდარს უნივერსიტეტის ისტორიაში ყველაზე მძიმე დღედ აფასებს.
„8 ნოემბერს დილით, სასწავლო პროცესის დაწყებამდე, სააკაშვილის ბრძანებით, უნივერსიტეტში სპეცდანიშნულების რაზმი ხელკეტებითა და მხუთავი აირით აუდიტორიებში სტუდენტებს გაუსწორდა. საქმე ამ საკითხთან დაკავშირებით აღძრულია, თუმცა პასუხისგებაში არავინ მიცემულა. დანაშაულის გამოძიება სახელმწიფოს ერთ-ერთი უმთავრესი ფუნქციაა. შესაბამისი შედეგი მალე უნდა დადგეს",- განაცხადა აჭარის უმაღლესი საბჭოს წევრმა ცოტნე ანანიძემ.