ქეთევან ციხელაშვილი ალან დანკანს შეხვდა
შერიგებისა და სამოქალაქო თანასწორობის საკითხებში საქართველოს სახელმწიფო მინისტრი ქეთევან ციხელაშვილი, საგარეო საქმეთა მინისტრ დავით ზალკალიანთან ერთად, დიდი ბრიტანეთისა და ჩრდილოეთ ირლანდიის გაერთიანებული სამეფოს სახელმწიფო მინისტრს ევროპისა და ამერიკის საკითხებში, სერ ალან დანკანს შეხვდა.
როგორც „ინტერპრესნიუსს“ შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატიდან აცნობეს, შეხვედრაზე ქეთევან ციხელაშვილმა სტუმარს საქართველოს ოკუპირებულ ტერიტორიებზე არსებული მდგომარეობა გააცნო, დეტალურად ისაუბრა იმ გამოწვევებზე, რომელთა წინაშეც ადგილობრივ მოსახლეობას უწევს ცხოვრება, ხაზი გაუსვა მთავარ გამოწვევას - განგრძობით ოკუპაციას.
შეხვედრაზე საუბარი ასევე შეეხო საქართველოს მთავრობის შერიგებისა და ჩართულობის პოლიტიკას. შეხვედრაზე იმსჯელეს ახალ სამშვიდობო ინიციატივაზე „ნაბიჯი უკეთესი მომავლისკენ“ და მისი განხორციელების პერსპექტივებზე.
„ბრიტანეთი ის ქვეყანაა, რომელიც დიდი ხანია ნდობის, მშენებლობისა და დიალოგის პროექტებს ხელს უწყობს. მინისტრმა დღეს ძალიან მნიშვნელოვანი გზავნილები გააკეთა. მან ხაზი გაუსვა, რომ ბრიტანეთისთვის, ისევ, როგორც ჩვენი სხვა პარტნიორებისთვის, სრულიად მიუღებელია ის ქმედებები, რომელთაც რუსეთი პერიოდულად პროვოკაციებისა და ე.წ. ბორდერიზაცის სახით, ხოლო პერმანენტულად - მიმდინარე ოკუპაციის სახით ახორციელებს. არავინ აპირებს, რომ ამ მოცემულობას შეეგუოს ან შეურიგდეს. მან ძალიან ცალსახად თქვა, რომ ამ მავთულხლართების დემონტაჟი უნდა მოხდეს, რომ მათ არანაირი მომავალი არ გააჩნიათ და რა თქმა უნდა, ბრიტანეთი გააგრძელებს საქართველოს სამშვიდობო ძალისხმევის მხარდაჭერას, რომელიც ერთის მხრივ ამ უკანონო პროცესის შეკავებისა და დეოკუპაციისკენ, ხოლო მეორეს მხრივ, შერიგებისა და ხალხთა შორის ნდობის აღდგენისაკენაა მიმართული. ასე რომ, ჩვენთვის ბრიტანეთი ძალიან მნიშვნელოვანი პარტნიორია“, - განაცხადა ქეთევან ციხელაშვილმა.
შეხვედრის ბოლოს სახელმწიფო მინისტრმა სტუმარს ჩართულობისა და მხარდაჭერისათვის მადლობა გადაუხადა. დაისახა სამომავლო თანამშრომლობის კონკრეტული გეგმები.
დღესვე „უორდროპის სტრატეგიული დიალოგის“ მე-5 პლენარული სხდომა გაიხსნა, რომელიც ქართულ-ბრიტანული თანამშრომლობის საკითხთა ფართო სპექტრის განხილვას ემსახურება.
v-if="article.gallery" v-html="article.gallery"
