სამტრედიის საკრებულოში მოქალაქესა და დეპუტატს შორის დაპირისპირებას საკრებულოს თავმჯდომარე ნუგზარ ჯამბურია ადასტურებს, თუმცა განმარტავს, რომ ფიზიკური დაპირისპირება არ მომხდარა და ადგილი ჰქონდა „ძიძგილაობას“.
„ეს ქალბატონი იყო ჩემთან მოსული, ვისაუბრეთ და შემდეგ თქვა, რომ ბადრი შენგელიასაც გაესაუბრებოდა. საუბარი კამათში გადაიზარდა. ასე, რომ ვთქვა ძიძგილაობას ჰქონდა ადგილი, მე მათ ვაშველებდი და როგორ მივცემდი ცემის უფლებას. ეს ადამიანები ერთ სოფელში ცხოვრობენ და ერთმანეთთან წლებია რაღაც ოჯახური კონფლიქტი აქვთ. დაპირისპირების დროს მე ვიყავი გამყოფი ზოლი მათ შორის და ვცდილობდი, მდგომარეობის განმუხტვას“, - განაცხადა ნუგზარ ჯამბურიამ.
მისივე თქმით, მომხდართან დაკავშირებით დაბარებულია საგამოძიებო უწყებაში. ამ დრომდე დაკითხული არ არის თავად ბადრი შენგელია, რომელიც ფიზიკურ დაპირისპირებას უარყოფს და აცხადებს, რომ მასსა და მაია ქორიძეს შორის სიტყვიერი შეკამათება პოლიტიკურ ნიადაგზე მოხდა.
„სამსახური არ აქვს და ალბათ, გაბრაზებულია ხელისუფლებაზე. ამაზე ვიკამათეთ. ახლოს არ მივკარებივარ და არც შევხებივარ“, - განაცხადა ბადრი შენგელიამ.
არსებული ინფორმაციით, ღანირის თემის მაჟორიტარი დეპუტატი ბადრი შენგელია მაია ქორიძეს ფიზიკურად გაუსწორდა.
მომხდარ დაპირისპირების ფაქტზე გამოძიება 126-ე მუხლით დაიწყო.