დაბა გერგეტში 1000-მდე ადგილობრივს წყლის მიწოდების მრავალწლიანი პრობლემა მოუგვარდა
გაერთიანებული წყალმომარაგების კომპანიამ ყაზბეგის მუნიციპალიტეტის დაბა გერგეტში წყალმომარაგების მაგისტრალური მილსადენის მოწყობის სამუშაოები დაასრულა.
როგორც „ინტერპრესნიუსს“ კომპანიიდან აცნობეს, შესრულებული სამუშაოების შედეგად, დაბა გერგეტში მცხოვრებ 1000-მდე ადგილობრივს წყლის მიწოდების მრავალწლიანი პრობლემა მოუგვარდა და მოსახლეობა ხარისხიან სასმელ წყალს სტაბილურად მიიღებს.
„მცხეთა-მთიანეთის რეგიონული ფილიალის თანამშრომლებს მუშაობა საკმაოდ რთულ რელიეფურ პირობებში უხდებოდათ. სამუშაოები ითვალისწინებდა წყალმომარაგების მაგისტრალური მილსადენისა და წყლის შემკრები რეზერვუარის მოწყობას.
დაბა გერგეტის მოსახლეობას წყალმომარაგება უწყვეტ რეჟიმში მიეწოდება, მაგრამ უხვი ნალექის დროს წყალი ხშირად იმღვრეოდა, ღია შენაკადებით მიედინებოდა და მოსახლეობისთვის წყლის შეფერხებით მიწოდებას იწვევდა. აღნიშნული პრობლემა ჩატარებული სამუშაოებით აღმოიფხვრა“, -ნათქვამია ინფორმაციაში.
