სახელმწიფო უსაფრთხოების სამსახურის უფროსთან ვახტანგ გომელაურთან არჩევნებთან დაკავშირებით არ გვისაუბრია,- ამის შესახებ საქართველოს პარლამენტში "ქართული ოცნების" დეპუტატმა ანზორ ბოლქვაძემ "ინტერპრესნიუსთან" საუბრისას განაცხადა. იგი გაერთიანებული ოპოზიციის განცხადებას გამოეხმაურა და კატეგორიულად უარყო საარჩევნო პროცესებში სუს-ის ჩართულობა. მისი თქმით, სახელმწიფო უსაფრთხოების სამსახურის უფროსთან შეხვედრას ხშირად მართავს.
„ვადასტურებ რომ ვახტანგ გომელაური ხულოში იმყოფებოდა. არჩევნებთან დაკავშირებით არ გვისაუბრია. ჩვენი საუბარი ჰოლანდიაში დაღუპულ ხულოს მკვიდრის გადმოსვენების პროცედურებს შეეხო. შეხვედრას "ქართული ოცნების" წევრები არ ესწრებოდნენ. არანაირ ამომრჩევლის მოსყიდვაზე არ ყოფილა საუბარი. ირაკლი ჯორბენაძეს ვთხოვ, წარმოადგინოს შეხვედის ფოტო მასალა, როცა ასეთ განცხადებას აკეთებს",- აცხადებს ანზორ ბოლქვაძე.
გაერთიანებული ოპოზიციის „ძალა ერთობაშიას" წევრის, ირაკლი ჯორბენაძის განცხადებით, ხულოს მუნიციპალიტეტში გუშინ სახელმწიფო უსაფრთხოების სამსახურის უფროსი ვახტანგ გომელაური "ქართული ოცნების" შტაბის წევრებს შეხვდა.
როგორც ირაკლი ჯორბენაძე აცხადებს, საქართველოს პარლამენტის დეპუტატის ანზორ ბოლქვაძის სასტუმროში, მმართველი გუნდის შტაბის წევრებმა არჩევნების გაყალბებაზე და ამომრჩეველთა მოსყიდვაზე იმსჯელეს.