„ძალა ერთობაშიას“ წევრი რეზო ხარაზი აჭარის უმაღლესი საბჭოს ფრაქცია „ქართული ოცნების" წევრს კორუფციაში ადანაშაულებს

გაერთიანებული ოპოზიციის „ძალა ერთობაშიას“ წევრი რეზო ხარაზი აჭარის უმაღლესი საბჭოს ფრაქცია „ქართული ოცნების" წევრს ილია ვერძაძეს კორუფციაში ადანაშაულებს. რეზო ხარაზის ინფორმაციით, ილია ვერძაძე საკანონმდებლო ორგანოს პარალელურად პროფესიულ კავშირებს ხელმძღვანელობს და კურორტ ბეშუმში პროფესიული კავშირების კუთვნილი მიწა „ქართული ოცნების" დეპუტატს, დავით ბაციკაძეს გადასცა. რეზო ხარაზი პროკურატურას ფაქტის შესწავლას სთხოვს.

გაერთიანებული ოპოზიციის ბრალდებას "ქართული ოცნების" დეპუტატმა დავით ბაციკაძემ უპასუხა.

„რეზო ხარაზმა არ იცოდა, რომ პროფკავშირები არ არის სახელმწიფო ორგანიზაცია. მე მართლაც შევიძინე მიწის ნაკვეთი, მაგრამ საბაზრო ფასად. ამ ნაკვეთის შეძენა ყველას შეეძლო",- განაცხადა ბაციკაძემ.