გაერთიანებული ოპოზიციის „ძალა ერთობაშიას" წევრი მირდატ ქამადაძე ბათუმის მერიას წინასაარჩევნოდ ამომრჩევლის მოსყიდვაში ადანაშაულებს.

როგორც მირდატ ქამადაძე განმარტავს, მიმდინარე წლის 8 და 10 აგვისტოს სტიქიის შედეგად დაზარალებული მოსახლეობა დახმარებას ითხოვდა, თუმცა მერიამ თავის დროზე მოქალაქეების მოთხოვნა არ გაითვალისწინა. მირდატ ქამადაძის განცხადებით, ბათუმის მერიამ წინასაარჩევნოდ ბიუჯეტში ცვლილებები განახორციელა და ახლა გადაწყვიტა მოქალაქეების დახმარება, რაც კანონდარღვევა და ამომრჩევლის მოსყიდვაა.

მირდატ ქამადაძე აუდიტის სამსახურს ფაქტის შესწავლას სთხოვს.

"წინასაარჩევნოდ ბიუჯეტში თანხების მონაცვლეობა მოხდა. ახლახანს ბათუმის მერიამ ბიუჯეტში ცვლილება მოახდინა. მოქალაქეები თავის დროზე დახმარებას ითხოვდნენ, თუმცა მერიამ მოსახლეობის თხოვნა არ გაითვალისწინა და ახლა წინასაარჩევნოდ გაუჩნდა სურვილი, რომ ბიუჯეტში ცვლილება მოეხდინა, რითაც კანონი დაარღვია. ეს არის ირიბად ამომრჩევლის მოსყიდვის მცდელობა. საუბარია დაახლოებით 300 ათას ლარზე მეტ თანხაზე",- განაცხადა მირდატ ქამადაძემ.