სარფის საბაჟო გამშვებ პუნქტზე ყველა სახის ტრანსპორტის მოძრაობა აღდგენილია,- ამის შესახებ "ინტერპრესნიუსს" შემოსავლების სამსახურში განუცხადეს. რაც შეეხება ქვეითად გადამსველებს, უწყებაში ამბობენ, რომ საბაჟოს კვეთას ქვეითები ჯერჯერობით ვერ შეძლებენ, რადგან თურქეთის მხარეს ტექნიკური აღდგენითი სამუშაოები მიმდინარეობს და მოძრაობა ეტაპობრივად დაიწყება.

მოქალაქეებმა დღეს "ინტრპრესნიუსთან" საუბრისას განაცხადეს, რომ სარფის საბაჟო გამშვებ პუნქტზე მოძრაობა შეფერხებულია. როგორც მოქალაქე მარიამ გამახარდია ამბობს, ქართულ მხარეს საპასპორტო კონტროლი გაიარეს, თუმცა თურქეთის მხარეს შეფერხება დახვდათ. მისი ინფორმაციით, საბაჟოზე რიგებია და მოქალაქეებს არ ატარებენ, მიზეზს კი არ ასახელებენ.