ბასა ფოცხიშვილი - სალომე ზურაბიშვილის ინაუგურაციის კონკრეტულ საკითხებზე მუშაობას დღეს ვიწყებთ

საქართველოს მეხუთე პრეზიდენტის, სალომე ზურაბიშვილის ინაუგურაციის საკითხზე შექმნილი საორგანიზაციო ჯგუფის წევრები დღეს, თელავში, ერეკლე მეფის სასახლის ტერიტორიას დაათვალიერებენ.

როგორც „ინტერპრესნიუსს“ ინაუგურაციის რეჟისორმა ბასა ფოცხიშვილმა განუცხადა, ჯგუფი თელავში 15:00 საათისთვის უნდა იყოს.

ფოცხიშვილის თქმით, დღეს საღამომდე ღონისძიების დეტალების ნაწილი დაზუსტდება.

„დღეს ვიწყებთ კონკრეტულ საკითხებზე მუშაობას. მივემგზავრებით თელავში. ერთადერთი რაც ვიცი, ინაუგურაციის ცერემონია იქნება სასახლის შიდა ტერიტორიაზე. კონკრეტული დეტალები საღამოს მეცოდინება“, - განაცხადა ფოცხიშვილმა.

ცნობისთვის, საქართველოს მთავრობის კანცელარიაში პრეზიდენტის ინაუგურაციის საკითხზე შექმნილი საკონსულტაციო ჯგუფის პირველი შეხვედრა გუშინ გაიმართა. კონსულტაციებს ინაუგურაციის ღონისძიების რეჟისორები ბასა ფოცხიშვილი და ნიკოლოზ შველიძე, ასევე ახლადარჩეული პრეზიდენტის ადმინისტრაციის მომავალი ხელმძღვანელი ლაშა ჟვანია ესწრებოდნენ.

სალომე ზურაბიშვილის ინაუგურაცია 16 დეკემბერს გაიმართება.