საფრანგეთში 3 წლის წინ დაკავებული ქართველი მეზღვაურის ოჯახი ხელისუფლებას დახმარებას სთხოვს
საფრანგეთში დაკავებული ქართველი მეზღვაურის ბადრი ბერიძის ოჯახი ხელისუფლებას დახმარებას სთხოვს. როგორც ბადრი ბერიძის შვილმა გიორგი ბერიძემ ჟურნალისტებთან საუბრისას განაცხადა, სამი წლის წინ თურქეთიდან საფრანგეთის მიმართულებით მოძრავი გემი „კარიბის პალმა" დააკავეს, რომლის კაპიტანი ბადრი ბერიძე იყო.
როგორც დაკავებულის შვილი გიორგი ბერიძე აცხადებს, გემზე უპრეცედენტოდ დიდი რაოდენობის -2, 4 ტონა კოკაინი აღმოაჩინეს, რის შესახებაც გემის კაპიტანს ინფორმაცია არ ჰქონდა. დაკავებულის შვილი ამბობს, რომ ბადრი ბერიძე 3 წელია საფრანგეთში ციხეში იმყოფება და მას ბრალს ვერ უმტკიცებენ. ქართველ კაპიტანთან ერთად, ეკიპაჟის 12 წევრი დააკავეს, ისინი თურქეთისა და უკრაინის მოქალაქეები არიან. გიორგი ბერიძე ამბობს, რომ მამამისი გემზე თურქულმა კომპანიამ დაასაქმა და მუშაობა რამდენიმ დღის დაწყებული ჰქონდა.
დაკავებულის ოჯახის წევრების განცხადებით, ბადრი ბერიძის ჯანმრთელობის მდგომარეობა მძიმეა.
„ამ ხნის განმავლობაში არაერთ საერთაშორისო ორგანიზაციას და საფრანგეთის ხელისუფლებას მივმართეთ. სამწუხაროდ უშედეგოდ, ამ საკითხზე საფრანგეთის ხელისუფლების მხრიდან რეაგირება არ მომხდარა. საქართველოს ხელისუფლებას მივმართავ თხოვნით, რომ პირად კონტროლზე აიყვანონ მამაჩემის საკითხი, მას ჯანმრთელობის მდგომარეობა გაუარესებული აქვს. სასამართლო პროცესი ამ ხნის განმავლობაში ხუთჯერ ჩატარდა და შედეგი არ არის. მტკიცებულება არ არსებობს მამაჩემის დანაშაულთან დაკავშირებით. საფრანგეთის ხელისუფლებისგან გვქონდა შემოთავაზება, რომ პროცესის დასრულებამდე გვეპოვა პიროვნება, რომელიც პროცესების დასრულებამდე მამაჩემს თავდებში დაუდგებოდა და ციხიდან გამოუშვებდნენ. ჩვენ ვიპოვეთ ასეთი პირი, რომელიც პასუხისმგებლობას აიღებდა, თუმცა საბოლოოდ მაინც არ გაითვალისწინეს. სამი წელია მამაჩემთან კომუნიკაცია გვიჭირს, მას სათანადოდ ჯანდაცვითი მომსახურება არ ეწევა. ვითხოვთ, რომ მოგვაქციონ ყურადღება",- განაცხადა გიორგი ბერიძემ.
