მეოთხე დღეა თელავში, ერეკლე მეფის სასახლის ტერიტორიაზე, არჩეული პრეზიდენტის ინაუგურაციისთვის მზადება გრძელდება. სამუშაო ჯგუფმა თითქმის სრულად დაასრულა სცენის და ტრიბუნების მოწყობა. ამასთანავე, სამუშაოები მიმდინარეობს ბატონის ციხის შიდა და გარე პერიმეტრზე.
„სამუშაოები დასრულებისკენ მიდის. ფაქტიურად შეკრულია ხის კონსტრუქცია მთლიანად, შუაში სცენაა, სადაც ფიცის მიღების ცერემონია უნდა წარიმართოს. ჩრდილოეთის და დასავლეთის მხარეს არის ტრიბუნები, სადაც სტუმრები განთავსდებიან. ფაქტიურად, ძირითადი სამუშაოები დასრულებულია. ამ ეტაპზე მიდის ფიცარნაგის მოწყობა და შემდეგ ხალიჩები დაიგება. როგორც ვიცი, ჯარი განლაგდება სცენიდან დასავლეთით, ტრიბუნებსა და სცენას შორის", - განაცხადა თელავის ისტორიული მუზეუმის დირექტორმა გურამ ურჩუხიშვილმა.
მოსამზადებელ სამუშაოებში ჩართულია,მუნიციპალიტეტის მერია, საგზაო სამმართველო და „ენერგო-პრო ჯორჯია“.