მესტიის მუნიციპალიტეტის სოფელ ჭუბერში ნენსკრას ჰიდროელექტროსადგურის მშენებლობისთვის მოსამზადებელი სამუშაოები მიმდინარეობს. ინფორმაციას ამის შესახებ „ნენსკრა ჰიდრო“ ავრცელებს.

ამჟამად ადგილზე 20-მდე ერთეული მძიმე ტექნიკაა მობილიზებული. 5 ივლისის სტიქიით დაზიანებული გზის რეაბილიტაცია 2018 წლის ბოლომდე დასრულდება. შედეგად ადგილობრივ მოსახლეობას გადაადგილება გაუადვილდება, სამშენებლო კომპანია კი კაშხლის სამშენებლო ტერიტორიაზე მიიღებს წვდომას.

მოსამზადებელი სამუშაოების მომდევნო ეტაპი მდინარე ნენსკრაზე 3 ხიდის მშენებლობა იქნება.

სამუშაოებს „ნენსკრა ჰიდროს“ სუბკონტრაქტორი კომპანია „ქართული სამშენებლო კონსორციუმი“ ახორციელებს.

პროექტის მოსამზადებელი სამუშაოები, რომლებიც ნენსკრასა და ნაკრას ხეობებში ხიდებისა და გზების მშენებლობა-რეაბილიტაციას, სამშენებლო ბანაკებისა და ელექტროგადამცემი ხაზების მშენებლობას მოიცავს, 2019 წლის ბოლოს დასრულდება.