რუსთავის მერი სკვერის მოწყობის სამუშაოების მიმდინარეობას გაეცნო

რუსთავის მერი ირაკლი ტაბაღუა, მე-12 მიკრო რაიონის #7, #8, #9 საცხოვრებელი კორპუსების ეზოში, სკვერის მოწყობის სამუშაოების მიმდინარეობას გაეცნო, - ამის შესახებ „ინტერპრესნიუსს“ რუსთავის მერიიდან აცნობეს.

მათივე ცნობით, მერი მოსახლეობასაც გაესაუბრა და ქალაქის მასშტაბით მიმდინარე სხვა ინფრასტრუქტურული პროექტების შესახებაც მიაწოდა ინფორმაცია. სამუშაოების დაწყებამდე, მე-12 მიკრო რაიონის აღნიშნულ უბანში, მოსახლეობისა და მუნიციპალიტეტის წარმომადგენლების ჩართულობით, უკანონო ავტოფარეხების დემონტაჟი განხორციელდა.

უსახური კონსტრუქციების დემონტაჟის თხოვნით, ქალაქის მერს თავად მოსახლეობამ მიმართა. ეზოს კეთილმოწყობის პროექტი სამ ეტაპად ხორციელდება, პირველ ეტაპზე, ტერტორიაზე სპორტულ-გამაჯანსაღებელი კუთხე მოეწყო. პროექტის ფარგლებში, უახლოეს მომავალში დასრულდება სკვერის კეთილმოწყობა და საბავშვო გასართობი მოედნის რეაბილიტაციაც მოხდება.