ზუგდიდის მუნიციპალიტეტის მერიამ, წელს პირველად, სოციალური პროგრამის ფარგლებში, ახალი პროექტი „სოციალურად დაუცველი ოჯახების კვებით უზრუნველყოფა“ დაიწყო. ამის შესახებ „ინტერპრესნიუსს“ ზუგდიდის მუნიციპალიტეტის მერიიდან აცნობეს.
მათი ინფორმაციით, პროგრამა ადმინისტრაციულ ერთეულებში მცხოვრები განსაკუთრებით მძიმე სოციალური და ეკონომიკური პირობების მქონე ადამიანების ზამთრის პერიოდში საკვები პროდუქტებით დახმარებას ითვალისწინებს.
413-მა ოჯახმა პროგრამის ფარგლებში, მერიისგან ერთჯერადი საკვები პროდუქტები: შაქარი, ფქვილი, ზეთი, კარტოფილი, მაკარონი და ხახვი მიიღო.
„აღნიშნული პროექტი მერიის საპილოტე პროექტია, რომელიც განსაკუთრებულად მძიმე მდგომარეობაში მყოფი ოჯახებისთვისაა განკუთვნილი. ბენეფიციარების საკვებ პროდუქტებზე 40 000 ლარამდე დაიხარჯა. ოჯახების სია, რომლებმაც საკვები პროდუქტები მიიღეს, მერის წარმომადგენლებმა ადმინისტრაციულ ერთეულებში შეადგინეს,” - ნათქვამია ინფორმაციაში.