აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით, დაბა სურამში მცხოვრებ დევნილებს გეგმური სამედიცინო გამოკვლევები ჩაუტარდათ.

როგორც „ინტერპრესნიუსს“ აფხაზეთის ავტონომიური რეპუბლიკის მთავრობიდან აცნობეს, გეგმური ღონისძიების ფარგლებში დევნილმა მოსახლეობამ ოჯახის ექიმის, პედიატრის, კარდიოლოგის, ნევროლოგის, რევმატოლოგის, ონკოლოგის, მამოლოგის, თერაპევტის, გინეკოლოგის, ენდოკრინოლოგის, ქირურგის, უროლოგის, ოფთალმოლოგის, ოტორინოლარინგოლოგისა და დერმატოლოგის მომსახურება მიიღო.

„ჩატარდა ინსტრუმენტული გამოკვლევები: ექოსკოპია (მუცლის ღრუს და ფარისებრი ჯირკვლის) ელექტროკარდიოგრაფია, გლუკოზის განსაზღვრა სისხლში. ასევე, C ჰეპატიტის სკრინინგი. ექიმების დანიშნულების შესაბამისად, აფხაზეთიდან დევნილ მოსახლეობაზე გაიცა მედიკამენტები.

გამოკვლევების მიმდინარეობის პროცესს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე ესწრებოდნენ“, - ნათქვამია ინფორმაციაში.