რუსთავი-თბილისის სამარშრუტო ტაქსების მძღოლების ნაწილმა მგზავრობის ღირებულების გაზრდის მოთხოვნით საპროტესტო აქცია გამართა. აქციის მონაწილეების განცხადებით, მძღოლებს მანქანის შენახვა ძვირი უჯდებათ, ამას ემატება დღიური ნორმა, რომელსაც კომპანია "ინტერტრანსს" უხდიან და თავად მიზერული თანხა რჩებათ, რომლითაც ოჯახის შენახვა უჭირთ. მძღოლების ნაწილი მგზავრობის ღირებულების 1 ლარი და 50 თეთრიდან 2 ლარამდე გაზრდას მოითხოვს.
საპროტესტო აქციაში 30 მძღოლი მონაწილეობდა. მათი განცხადებით, ეს გამაფრთხილებელი აქციაა და თუ ხელისუფლება, მგზავრობის ტარიფის გაზრდაზე არ დათანხმდება, რუსთავი-თბილისის ხაზზე მოძრავი ყველა მძღოლი გაიფიცება.