ღირსი მამა გიორგი მთაწმინდელის გორის გიმნაზიაში საშობაო ფესტივალი „გენეთლია“ მიმდინარეობს, - ამის შესახებ „ინტერპრესნიუსს“ გორის მერიიდან აცნობეს.

მათივე ინფორმაციით, ტრადიციად ქცეული ფესტივალი მოზარდებში რწმენის გაძლიერებასა და ჯანსაღი ცხოვრების წესის პოპულარიზაციას ისახავს მიზნად.

„ფესტივალის ფარგლებში, რომელშიც საპატრიარქოს მიერ დაფუძნებული სასწავლებლებისა და საჯარო სკოლის მოსწავლეები მონაწილეობენ, დაგეგმილია საკონფერენციო გამოსვლები, კონკურსები, სპორტული ასპარეზობები და ნამუშევრების გამოფენა. წელს მოსწავლეთა კონფერენცია საქართველოს პირველი რესპუბლიკის 100 წლისთავს ეძღვნება.

„გენეთლია“ გორში, გორისა და ატენის მიტროპოლიტის მეუფე ანდრიას ლოცვა - კურთხევით, უკვე მე - 13 იმართება. საშობაო ფესტივალი 11 იანვარს დასრულდება“, - ნათქვამია ინფორმაციაში.