მარნეულში, 15 წლის მოზარდი, სავარაუდოდ, ბუნებრივი აირით ინტოქსიკაციის შედეგად გარდაიცვალა. შემთხვევა, გუშინ საღამოს მოხდა. ოჯახის წევრების ინფორმაციით, გოგონა ოთახში ბუნებრივი აირის გამათბობელთან უგონო მდგომარეობაში ნახეს. ის სასწრაფო-სამედიცინო დახმარების ბრიგადამ მარნეულში კლინიკა „ავერსში“ გადაიყვანა. ექიმების ინფორმაციით, გოგონა კლინიკაში უკვე გარდაცვლილი მიიყვანეს.
როგორც „ინტერპრესნიუსს“ შსს-ში განუცხადეს, ფაქტთან დაკავშირებით გამოძიება სისხლის სამართლის კოდექსის 240-ე პრიმა მუხლით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.