ქუთაისში სამოქალაქო აქტივისტები და დასავლეთ საქართველოს დრიფტის ფედერაცია საპროტესტო მსვლელობას აწყობენ.
ფედერაციის წევრები და აქციის მონაწილეები საპატრულო პოლიციასა და გზების დეპარტამენტს მოუწოდებენ, ქუთაისი-წყალტუბოს გზაზე განთავსდეს სიჩქარის მარეგულირებელი კამერები, ასევე ე.წ "ბუგაროკები" ან ამკრძალავი ნიშნები. აქციის მონაწილეები აცხადებენ, რომ ქუთაისი-წყალტუბოს ავტომაგისტრალი სახიფათო გზაა, სადაც ორი დღის წინ სამი ახალგაზრდა დაიღუპა.
დღესვე წყალტუბოს გზის მიმართულებით სამგლოვიარო-საპროტესტო მსვლელობა იმართება.
„ინერტული დამოკიდებულების გამო რეალობა არ შეცვლილა და აღნიშნული გზა დღემდე საფრთხის შემცველია. ქუთაისი-წყალტუბოს გზაზე არ არსებობს სიჩქარის შემზღუდველი და მარეგულირებელი არც ერთი ნიშანი", - განუცხადა “ინტერპრესნიუსს“ დასავლეთ საქართველოს დრიფტის ფედერაციის დამფუძნებელმა დავით კუხიანიძემ.
საპროტესტო აქცია სოციალური ქსელით გუშინ დაიგეგმა.