დმანისში სტიქიისგან შექმნილ მდგომარეობას დღეს ქვემო ქართლის გუბერნატორი შოთა რეხვიაშვილი მოადგილესთან და დმანისის მერთან ერთად გაეცნო.
ძლიერმა ქარმა დმანისის ტერიტორიაზე ორ მრავალსართულიან კორპუსს სახურავები გადახადა და კერძო საცხოვრებელი სახლების სახურავები და რამდენიმე ავტომანქანაც დააზიანა. სახანძრო-სამაშველო ჯგუფები და ადგილობრივი თვითმმართველობის შესაბამისი სამსახურის წარმომადგენლები ამ დრომდე გაწმენდით სამუშაოებს ინტენსიურ რეჟიმში ახორციელებენ.
როგორც ქვემო ქართლის გუბერნატორმა შოთა რეხვიაშვილმა ჟურნალისტებთან საუბარში განაცხადა, წინასწარი მონაცემებით, ძლიერი ქარისგან მიყენებული ზარალის ოდენობა დაახლოებით 300 ათას ლარს შეადგენს. მუნიციპალიტეტში უკვე დაწყებულია დაზიანებული სახურავების აღდგენა-რეაბილიტაციის პროცესი.