ზუგდიდში გარევაჭრობა ყველა ლოკაციაზე აიკრძალება. ცენტრალური ბაზრის მიმდებარედ ტროტუარებზე განთავსებული დახლები მერიის დასუფთავების სამსახურის თანამშრომლებმა წუხელ აიღეს. მერიაში აცხადებენ, რომ აღნიშნულ ტერიტორიაზე მომუშავებს ალტერნატიული ფართი უკვე შესთავაზეს და უახლოეს დღეებში გარევაჭრობა ქალაქის ყველა ლოკაციაზე აიკრძალება.
მოვაჭრეთა ნაწილი თანახმაა ტროტუარიდან ბაზრის შიდა ტერიტორიაზე გადაინაცვლოს, თუმცა შიშობენ,რომ იქ გადასახადს ვერ გადაიხდიან.
ამ ეტაპზე ცენტრალური ბაზრის მიმდებარედ გარემოვაჭრეთა ის ნაწილი რჩება, რომელიც ტანსაცმლით ვაჭრობს.
„მიმდინარეობს ადგილების მოძიება ტანსაცმლით მოვაჭრეებისთვის და როგორც კი იქნება ალტერნატიული ფართი, მოხდება მათი გადაყვანა, ამის თაობაზეც გაფრთხილებულები არიან“, - ამბობენ მერიაში.