ბათუმში, თავდაცვის სამინისტროს ერთ-ერთ ბაზაზე დაჭრილი სამხედროს ჯანმრთელობის მდგომარეობა სტაბილურია. როგორც კლინიკა „მედცენტრში" განაცხადეს, 23 წლის ჯარისკაცს მხარის არეში ქირურგიული ჩარევა დასჭირდა, იგი ამ დროისათვის პალატაშია გადაყვანილი.

დაჭრილი ჯარისკაცი თავდაცვის სამინისტროში 8 თვეა მსახურობს. როგორც ჯარისკაცის მამამ აღნიშნა, ჯარისკაცები მეგობრები არიან და შემთხვევით გასროლის შედეგად მისი შვილი დაიჭრა.

მომხდარ ფაქტზე გუშინ თავდაცვის სამინისტრომ განცხადება გაავრცელა.

„ბათუმში, საგუშაგოზე სამხედრო მოსამსახურემ ავტომატური ცეცხლსასროლი იარაღიდან განახორციელა უნებლიე გასროლა, რის შედეგადაც ბათუმში დისლოცირებულ ლოგისტიკური უზრუნველყოფის სარდლობის საბრძოლო მასალების შენახვის ბაზის სავალდებულო სამხედრო მოსამსახურე დაშავდა“, - განაცხადეს საქართველოს თავდაცვის სამინისტროში.