ქეთევან ციხელაშვილი კარალეთის მოსახლეობას შეხვდა

შერიგებისა და სამოქალაქო თანასწორობის საკითხებში საქართველოს სახელმწიფო მინისტრი ქეთევან ციხელაშვილი, სოფლის მხარდაჭერის პროგრამის ფარგლებში, კარალეთის მოსახლეობას შეხვდა.

როგორც „ინტერპრესნიუსს“ შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატიდან აცნობეს,სახელმწიფო მინისტრმა ადგილობრივებისგან მათ წინაშე მდგარი გამოწვევებისა და საჭიროებების შესახებ მიიღო ინფორმაცია. სოფლის კრებაზე კარალეთის მოსახლეობამ მათთვის პრიორიტეტული იმ ინფრასტრუქტურული პროექტების შესახებ იმსჯელა, რომელთა დაფინანსებაც სოფლის მხარდაჭერის პროგრამის ფარგლებშია შესაძლებელი.

სახელმწიფო მინისტრმა პროექტს უმნიშვნელოვანესი უწოდა და განაცხადა, რომ 20 მილიონი ლარია გამოყოფილი, რათა სოფლებს ის პირველადი და ყველაზე მნიშვნელოვანი საჭიროებები დაუკმაყოფილდეთ, რომელთაც თავად მოსახლეობა განსაზღვრავს.

„15 იანვრიდან მუშაობა ინტენსიურად მიმდინარეობს. ყველა სოფელში ტარდება სოფლის კრება, სადაც მოსახლეობას შესაძლებლობა აქვს თავად განსაზღვროს ის ინფრასტრუქტურული პროექტი, რომელიც უნდა, რომ პირველ ეტაპზე დაფინანსდეს. რა თქმა უნდა, თანხა შეიძლება არ იყოს ისეთი, რომელიც თითოეულ სოფელში ყველა პრობლემას მოაგვარებს, მაგრამ ჩვენ ამ ნაბიჯებს ვდგამთ და გვინდა, რომ ეს იყოს მუდმივი პრაქტიკა, როდესაც თავად სოფლის მოსახლეობის მონაწილეობით შევძლებთ საჭიროებებზე პასუხის გაცემას და ამ სოფლების მეტად მოძლიერებას. ამგვარად მოსახლეობა სოფლებში კიდევ უფრო მეტად დამაგრდება და ისეთი საქმიანობის განხორციელებას შეძლებს, რომელიც მეტ შემოსავალსა და დოვლათს მოუტანს,“ - განაცხადა ქეთევან ციხელაშვილმა.

აპარატის განცხადებით, სოფლის მხარდაჭერის პროგრამით მუნიციპალიტეტებში მცირე ინფრასტრუქტურული პროექტები დაფინანსდება. საქართველოს 3 700 სოფლის მცხოვრებ ნახევარ მილიონზე მეტ ადამიანს, სოფლის კრებებზე, თავად ექნება საშუალება განსაზღვროს, თუ რა ტიპის პროექტი უნდა განხორციელდეს მათ სოფელში. პროგრამის მიმდინარეობისა და შესრულების მონიტორინგს კი რეგიონული განვითარებისა და ინფრასტრუქტურის სამინისტრო განახორციელებს.

შეხვედრას აგრეთვე ესწრებოდნენ გორის მერი და მუნიციპალიტეტის წარმომადგენლები.

დავით ნარმანია - თუ არ გვინდა გაგვიძვირდეს ტარიფები, უნდა ავაშენოთ ჰესები
ქართული პრესის მიმოხილვა 22.10.2019
დიმიტრი შველიძე  -  მომავალი პარლამენტი ნაყიდი დეპუტატებით და ფრაქციებით აივსება
სასტუმრო „რადისონ ბლუ ივერიამ“ 10 წლის იუბილე აღნიშნა