ზუგდიდის ცენტრალური ბაზრის წინ განთავსებული ტაქსების სადგომზე, სადაც მერიის თანამშრომლებმა შესაბამისი ტრაფარეტი აიღეს, მძღოლები მუშაობას კვლავ გააგრძელებენ. შესაბამისი გადაწყვეტილება მერის მოვალეობის შემსრულებელმა მაიზერ ნანავამ მძღოლებთან შეხვედრის შემდეგ მიიღო.
როგორც „ინტერპრესნიუსს“ მერიაში განუცხადეს, აღნიშნულ ტერიტორიაზე მოძრაობა გაკონტროლდება და ტრანსპორტის რაოდენობაც შემცირდება.
„მძღოლები გააგრძელებენ მუშაობას ბაზრის წინ, თუმცა ისე, რომ არ მოხდეს მოძრაობის შეფერხება და არ შეიქმნას საცობი. ასევე, შემცირდება ტრანსპორტის რაოდენობა. მას სატრანსპორტო სამსახური გააკონტროლებს“, - ამბობენ მერიაში.
ზუგდიდის ცენტრალური ბაზრის წინ ტაქსების დგომა დღეს აიკრძალა. მძღოლების თქმით, ისინი აქ, წლებია, მუშაობენ და ადგილის დატოვებას არ აპირებენ.