ბათუმის მერიასთან გარემოვაჭრეების აქციას ბათუმის საკრებულოს „ერთიანი ნაციონალური მოძრაობის" წევრი მირდატ ქამადაძე შეუერთდა. მისი განცხადებით, ადგილობრივმა ხელისუფლებამ გარემოვაჭრეებთან დაკავშირებით გადაწყვეტილება კომპლექსურად უნდა მიიღოს.
მირდატ ქამადაძის თქმით, მთავარია მოქალაქეები შემოსავლების გარეშე არ დარჩნენ და უკეთესი ვერსია შესთავაზონ, ქალაქი კი გარევაჭრობისგან გათავისუფლდეს.
„აქ გამოსავალი არის მარტივი. ხელისუფლებამ გადაწყვეტილება კომპლექსურად უნდა მიიღოს. ხელისუფლებამ ნახა, რომ არჩევნებში ეს ადამიანები სჭირდებოდა და ივნისში აღნიშნული გადაწყვეტილება გადაიფიქრა. ჩვენ თავის დროზე შევთავაზეთ, რომ სადაც გარემოვაჭრეებს ადგილებს სთავაზობენ, ამ ტერიტორიაზე ცენტრალური ავტოსადგური უნდა გაკეთდეს და ხალხის მოძრაობა იქნება და მუშაობაც შესაძლებელი იქნება. ჩემი მთავარი ამოცანაა, რომ ხალხისთვის მისაღები გადაწყვეტილება მიიღონ. ბათუმისთვის კარგია, უხდება მოწესრიგებული იყოს ქუჩა, თუმცა მშიერი მოქალაქეების აზრი უნდა გაითვალისწინოს მთავრობამ",- განაცხადა მირდატ ქამადაძემ.
ბათუმის მერიასთან გარემოვაჭრეები აქციას მართავენ. შეკრებილები მერთან შეხვედრას ითხოვენ. ისინი წერეთლის ქუჩაზე გარევაჭრობის აკრძალვას აპროტესტებენ.