ფოთის საკრებულოს სხდომა ხმაურისა და ურთიერთდაპირისპირების  ფონზე მიმდინარეობდა

ფოთის საკრებულოს სხდომა ხმაურისა და ურთიერთდაპირისპირების ფონზე მიმდინარეობდა. ოპოზიციამ საკრებულოს თავმჯდომარე ირაკლი კაკულია უმოქმედობაში დაადანაშაულა. მათი თქმით, იგი არ ინტერესდება ქალაქში დაწყებული და შეჩერებული ინფრასტრუქტურული პროექტებით.

მათივე განცხადებით, კაკულია პირადი ბიზნეს- პროექტების განხორციელებით არის დაკავებული.

„ფოთის საკრებულოს თავმჯდომარე არ ინტერესდება არც ერთი ინფრასტრუქტურული პროექტით, რომელიც გაჩერებულია. ასე იყო მისი მერობის პერიოდშიც. სამაგიეროდ ინტერესდება პირადი ბიზნეს-პროექტებით. კინო-თეატრის გვერდით შენდება სამედიცინო დაწესებულება. იმ ტერიტორიაზე მსგავსი ობიექტის მშენებლობა ჩემი აზრით დაუშვებელია. არაა აუცილებელი იყო არქიტექტორი მიხვდე, რომ იქ მსგავსი ინფრასტრუქტურული პროექტის განხორციელება, რასაც კაკულია აკეთებს, არ შეიძლება, არაა გამართლებული, რადგან ისტორიული ადგილია და ქალაქის იერ-სახეს დაამახინჯებს. მაგრამ ეს მისი ოჯახის ბიზნეს-ინტერესია. არ იცის წყალარინების ქსელის რეაბილიტაციასთან დაკავშირებით რა ხდება, არ იცის რა ხდება კინო-თეატრის შენობასთან დაკავშირებით, რომლის მშენებლობაც წლებია გაჩერებულია და კონსერვაციის ვადაც ამოწურული აქვს,“ - განუცხადა ჟურნალისტებს საკრებულოს წევრმა ,,ევროპული საქართველოდან“ ვახტანგ დარცმელიძემ.

საკრებულოს თავმჯდომარე ირაკლი კაკულიამ კლინიკის მშენებლობა დაადასტურა, თუმცა განაცხადა, რომ მას მისი ოჯახის წევრები აშენებენ და ოპოზიციის ბრალდებებს უსაფუძვლო უწოდა.

„ოპოზიცია თავის საქმეს აკეთებს. გონივრული ეჭვი მიჩნდება, რომ რაღაც დაინტერესებაა ალბათ ამის უკან, რადგან პირადად ჩემზე ისაუბრეს დღეს. სხდომაზე სულ სხვა საკითხებზე იყო პოლემიკა. ბოლო პერიოდში ქალაქში, მიუხედავად იმისა, რომ გაჩერებულია და კარგად არ მიმდინარეობს კანალიზაციის პროექტი, ბევრი სხვა ინფრასტრუქტურული პროექტი ხორციელდება. ვფიქრობ, სწორედ ეს იწვევს ალბათ ოპოზიციის გაღიზიანებას. რაც შეეხება მშენებარე კლინიკას, მე პირადად არანაირი კავშირი არა მაქვს ამასთან, ჩემი ოჯახის წევრი აშენებს და ბანკის კრედიტები შეუძლიათ ნახონ, თუ როგორ გაკეთდა, რა შემოსავლები აქვს. სანამ ფოთის მერი გავხდებოდი, ბიზნეს საქმიანობით ვიყავი დაკავებული. სულ საკრებულოს თავმჯდომარეც ხომ არ ვიქნები? ამიტომ, რაც კანონს ექვემდებარება, იმ ქმედებას ვერავინ დამიშლის“, - აღნიშნა ირაკლი კაკულიამ.

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
სილქნეტი მედიასივრცეში გავრცელებულ ბოლოდროინდელ ბრალდებას ეხმიანება სატელეკომუნიკაციო ბაზარზე ოლიგოპოლიასთან დაკავშირებით
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს