უნდა მოვახერხოთ, რომ ერთი მხრივ, ადამიანების პატივი და ღირსება დავიცვათ, ხოლო მეორე მხრივ - სიტყვისა და გამოხატვის თავისუფლება, რასაც კონსტიტუცია ადგენს, - ამის შესახებ ჟურნალისტებს პარლამენტის ადამიანის უფლებათა დაცვის კომიტეტის თავმჯდომარემ სოფიო კილაძემ განუცხადა.

მისი თქმით, ე.წ. ფეიკ ნიუსებისა და დეზინფორმაციის გავრცელების საკითხთან დაკავშირებით მას პრეზიდენტის საპარლამენტო მდივანთან დიმიტრი გაბუნიასთან კომუნიკაცია ჰქონდა.

“სალომე ზურაბიშვილის მოსაზრება მესმის. პრინციპში იგივე თქვა ირაკლი კობახიძემ, რომ ე.წ. ფეიკ ნიუსებს, დეზინფორმაციას და ცილისწამებას, რასაც საზოგადოებაში სერიოზული დისონანსი შეაქვს, რაღაცანაირად უნდა ვებრძოლოთ. არის რამდენიმე ქვეყნის გამოცდილება, რომელთაც ეს დაიწყეს. ევროკავშირიც ხმამაღლა საუბრობს იმის შესახებ, რომ ევროკავშირის ქვეყნები დეზინფორმაციის გავრცელებას სამართლებრივი მეთოდებით უნდა ებრძოლოს. ჩვენც ვალდებული ვართ, ზომები მივიღოთ, თუმცა იმავდროულად, მედიისა და სიტყვის თავისუფლება არაპროპორციულად არ უნდა შეიზღუდოს - სწორად უნდა დავიჭიროთ ბალანსი კონსტიტუციის საფუძველზე“, - განუცხადა ჟურნალისტებს სოფიო კილაძემ.