ბათუმში, ჭავჭავაძისა და ლერმონტოვის ქუჩების კვეთაზე გარემოვაჭრეებს დღეიდან ვაჭრობა აეკრძალათ. მათ გაფრთხილება ბათუმის მერიისგან გუშინ მიიღენ და მერიის მოთხოვნას დაემორჩილნენ, თუმცა ისინი ალტერნატიული ფართის გამოყოფას და ვაჭრობისთვის ხელსაყრელ ადგილს ითხოვენ.
ბათუმის მერიაში აცხადებენ, რომ ქალაქის მასშტაბით ტროტუარებზე ეტაპობრივად გარევაჭრობა აიკრძალება და გარემოვაჭრეებს ალტერნატიულ ფართებს სთავაზობენ, სადაც ისინი საკუთარი პროდუქციის რეალიზებას შეძლებენ.
შეგახსენებთ, რომ წერეთლის ქუჩაზე რამდენიმე დღის წინ ბათუმის მერიამ დახლებისა და ჯიხურებისგან ქუჩა გაათავისუფლა, რასაც მოვაჭრეების პროტესტი მოჰყვა. ბათუმის მერიამ გარემოვაჭრეები ავტოსადგურის ტერიტორიაზე გადაიყვანა, ისინი მერიას პირობების დარღვევაში ადანაშაულებენ. გარემოვაჭრეების თქმით, ავტოსადგურის ადმინისტრაციამ მათ გარკვეული თანხის გადახდა მოსთხოვა, რასაც ისინი აპროტესტებენ.