აბაშის მერმა ფოთში მაშველები მოინახულა, რომლებიც რიონში 16 წლის მოზარდის სამძებრო სამუშაოებს აწარმოებენ

აბაშის მუნიციპალიტეტის მერმა, ლევან მაკალათიამ ფოთში მაშველები მოინახულა. აღნიშნული ინფორმაცია „ინტერპრესნიუსს“ აბაშის მუნიციპალიტეტიდან მიაწოდეს.

მათივე ინფორმაციით, აბაშის მუნიციპალიტეტის მერი ლევან მაკალათია, მერის მოადგილე ირაკლი პერტენავა, ფოთისა და ხობის მიტროპოლიტ, მეუფე გრიგოლთან და ფოთის მერის მოადგილე გიორგი ფარეშიშვილთან ერთად ფოთში იმყოფებოდნენ, სადაც მდინარე რიონში 16 წლის მოზარდის სამძებრო სამუშაოები რამდენიმე დღეა მიმდინარეობს.

ადგილზე შექმნილია სპეციალური შტაბი, პროცესში ჩართულია 30-მდე მაშველი, მათ შორის მყვინთავების დამატებითი ძალები.

“თითოეული აბაშელის სახელით ვუთანაგრძნობ ოჯახს ამ უდიდეს ტრაგედიას, ეს არამხოლოდ ოჯახის, ფოთელებისთვისაც უმძიმესი ტკივილია. მაშველები მოვინახულეთ, მეუფე გრიგოლმა დალოცა ისინი და ოჯახის ამ მძიმე განსაცდელზე ისაუბრა.

ეჭვი არ გვეპარება მაშველების პროფესიონალიზმში, ამაში მათ აბაშის მუნიციპალიტეტშიც არაერთხელ დაგვარწმუნეს. ამჯერადაც ისინი 24 საათიან რეჟიმში მუშაობენ, მჯერა, ყველაფერს გააკეთებენ, რათა 16 წლის ბიჭი იპოვონ“, - განაცხადა ლევან მაკალათიამ.