აჭარის ავტონომიური რესპუბლიკის უმაღლესი საბჭოს ოფიციალური დელეგაცია უმაღლესი საბჭოს თავმჯდომარის დავით გაბაიძის ხელმძღვანელობით, კატოვიცეში შეხვედრებს მართავს.

როგორც „ინტერპრესნიუსს“ უმაღლესი საბჭოდან აცნობეს, ვიზიტის მთავარ მიზანს სილეზიის რეგიონულ პარლამენტთან ახალი თანამშრომლობის განხილვა და სხვადასხვა მიმართულებით სამთავრობო უწყებებს შორის თანამშრომლობის გააქტიურება წარმოადგენს.

„რეგიონების საკანონმდებლო უწყებებს შორის ახალი თანამშრომლობა ხელს შეუწყობს ორმხრივი ურთიერთობების გაღრმავებას და საკანონმდებლო მიმართულებით ევროპული გამოცდილების გაზიარებას. სილეზიის რეგიონული პარლამენტი იქნება პოლონეთის რესპუბლიკის მეორე საკანონმდებლო ორგანო, რომელთანაც აჭარის უმაღლესი საბჭო მჭიდროდ თანამშრომლობს.

ვიზიტის ფარგლებში გაიმართა ოფიციალური შეხვედრები სილეზიის სავოევოდოს მარშალთან იაკუბ ჩელსტოვსკისთან, სილეზიის რეგიონული პარლამენტის თავმჯდომარესთან იან კავულოკთან, სილეზიის სავოევოდოს ვიცე-მარშალთან ვოიჩეხ კალუცასთან, სილეზიის უნივერსიტეტის პროერექტორთან ტომაშ პიეტშიკოვსკისთან და სავაჭრო-სამრეწველო პალატის თავმჯდომარესთან ტომაშ ჟავიონისთან“, - ნათქვამია აჭარის უმაღლესი საბჭოს ინფორმაციაში.