რუსთავის საქალაქო სასამართლოს მოსამართლე ქეთევან ლუაშვილმა, ქურდობის მცდელობის ბრალდებით დაკავებული გოდერძი მახარაშვილი და არჩილ ანთიძე სასამართლო დარბაზიდან გაათავისუფლა. ორივე ბრალდებულის პატიმრობიდან გათავისუფლების განჩინება, მოსამართლემ ცოტა ხნის წინ გამოაცხადა.
ქეთევან ლუაშვილის გადაწყვეტილებით, ბრალდებულების ადვოკატები კმაყოფილები არიან და აცხადებენ, რომ განჩინება სამართლიანია, ვინაიდან მათი დაცვის ქვეშ მყოფებს დანაშაული არ ჩაუდენიათ. საქმეში არ იყო არც ერთი მტკიცებულება, რომელიც მათ მიმართ წაყენებულ ბრალს დაამტკიცებდა.
გოდერძი მახარაშვილი და არჩილ ანთიძე 9 თვის წინ, რუსთაველის #19-ში, არჩილ ანთიძის საცხოვრებელ ბინასთან, რუსთავის პოლიციის მე-2 განყოფილების თანამშრომლებმა დააკავეს. გამოძიება დაკავებულებს ანთიძის ეზოში მისი მეზობლის ავტომობილიდან, ე.წ. კატალიზატორის მოპარვის მცდელობას ედავებოდა.
სასამართლო პროცესის დაწყებამდე ბრალდებულების ოჯახის წევრებმა და მეგობრებმა საპროტესტო აქცია გამართეს. აქციის მონაწილეები მათი პატიმრობიდან გათავისუფლებას მოითხოვდნენ და აცხადებდნენ, რომ ორივე უკანონოდ დააკავეს და 9 თვე ცრუ ბრალდებით გაატარეს ციხეში. თავად ბრალდებულებიც თავს დამნაშავედ არ ცნობდნენ და აცხადებდნენ, რომ მათი მხრიდან მსგავს ქმედებას ადგილი არ ჰქონია.