სალომე სამადაშვილი - რუსეთიდან ელექტროენერგიის შესყიდვასა და აფხაზეთის ოკუპირებული ტერიტორიისთვის მიწოდებაზე ხელშეკრულება გაფორმდა, მოვითხოვთ, მის გასაჯაროებას

დღეს ჩვენი გადასახადის გადამხდელების სახსრები საოკუპაციო რეჟიმის დახმარებისთვის, მისი სუბსიდირებისთვის გამოიყენება,- ამის შესახებ ფრაქცია „ნაციონალური მოძრაობის“ წევრმა სალომე სამადაშვილმა განაცხადა.

მისი თქმით, გაერთიანებული ოპოზიციისთვის ცნობილი გახდა, რომ ეკონომიკის მინისტრის გიორგი ქობულიას გადაწყვეტილებით გაფორმდა ხელშეკრულება რუსეთიდან 45 მილიონი კვ/სთ ელექტროენერგიის შესყიდვისა და აფხაზეთის ოკუპირებული ტერიტორიისთვის უფასოდ მიწოდების შესახებ. სამადაშვილი ხელისუფლებას მოუწოდებს, საჯარო გახადოს აღნიშნული ხელშეკრულების დეტალები.

„ჩვენთვის ცნობილი გახდა, რომ მაშინ, როდესაც რუსეთი ყველანაირად ამყარებს ჩვენი ტერიტორიების ოკუპაციასა და ანექსიას, ზრდის საკუთარ სამხედრო ინფრასტრუქტურას ამ რეგიონებში, საქართველოს მთავრობამ, კერძოდ, მინისტრმა ქობულიამ მიიღო გადაწყვეტილება, ფაქტობრივად, სუბსიდირება გაუკეთოს ოკუპირებული ტერიტორიების ენერგოსისტემას ქართველი გადასახადის გადამხდელთა ჯიბიდან. კონკრეტულად, როგორც ჩვენთვის გახდა ცნობილი, ქობულიას დავალებით გაფორმდა ხელშეკრულება რუსეთიდან 45 მილიონი კვტ/სთ ელექტროენერგიის შესყიდვისა და აფხაზეთის ოკუპირებული ტერიტორიისთვის უფასოდ მიწოდების შესახებ, რასაც განახორციელებს საქართველოს ენერგეტიკული სისტემის კომერციული ოპერატორის „ესკოს“ და რუსულ კომპანია “ინტერაოს“ შორის გაფორმებული კონტრაქტის საფუძველზე. „ენგურჰესის“ მეშვეობით რეალურად უკვე ვუკეთებდით სუბსიდირებას აფხაზეთის ენერგოსისტემას, 55% მიეწოდებოდა სწორედ აფხაზეთის ოკუპირებულ ტერიტორიას. მაგრამ, როგორც ჩანს, გაჩნდა დეფიციტი და მის დასაფარად სახელმწიფო ბიუჯეტიდან უკვე 7 მილიონი ლარი დაიხარჯა. იმის გათვალისწინებით, რომ ფაქტობრივად გადასახადის გადამხდელების სახსრები გამოიყენება საოკუპაციო რეჟიმის დახმარებისთვის, მისი სუბსიდირებისთვის, რომ ფაქტობრივად ვაფინანსებთ რუსი სამხედროების სამხედრო ბაზებს, მათ შორის ოკუპირებულ ტერიტორიაზე აფხაზეთში, უფლება გვაქვს, მოვითხოვოთ ამ ხელშეკრულების ყველა დეტალის გასაჯაროება. საზოგადოებამ თავად განსაჯოს, სახელმწიფო ინტერესებში რამდენად შედის მსგავსი კონტრაქტის გაფორმება. საკითხავია, სანაცვლოდ რას იღებს ჩვენი სახელმწიფო დეოკუპაციის თვალსაზრისით, რეალურად არანაირი პროგრესი არ გვაქვს, რუსეთის ხელისუფლება სულ უფრო აგრესიულ განცხადებებს აკეთებს. გამოვითხოვეთ ინფორმაცია შესაბამისი სახელმწიფო უწყებებისგან, ჯერჯერობით არ გასცემენ ინფორმაციას და ითხოვენ, წერილობით მივმართოთ, რის შემდეგაც გაასაჯაროვებენ, მაგრამ გვაქვს საფუძვლიანი ეჭვი, ვიფიქროთ, რომ საქმე გვაქვს კერძო ინტერესებთან. როგორც ჩანს, რაღაც კავშირები არსებობს შესაბამის რუსულ კომპანიებთან და მათი და რუსების საოკუპაციო ინტერესები ბევრად პრიორიტეტულია დღევანდელი ხელისუფლებისთვის, ვიდრე ის, თუ რაში დაიხარჯება ჩვენი გადასახადის გადამხდელების სახსრები“, - განაცხადა სამადაშვილმა.­­

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს