აჭარის ავტონომიური რესპუბლიკის უმაღლესი საბჭოს ოფიციალურმა დელეგაციამ, უმაღლესი საბჭოს თავმჯდომარე დავით გაბაიძის ხელმძღვანელობით ქალაქ ვროცლავში რეგიონულ პარლამენტთა შორის სამმხრივ სამუშაო შეხვედრაში მიიღო მონაწილეობა.

აჭარის უმაღლესი საბჭოს პრესსამსახურის ინფორმაციით, დელეგაციის შემადგენლობაში არიან: ფრაქცია „ქართული ოცნება-მაჟორიტარების“ თავმჯდომარე - ილია ვერძაძე და აგრარულ და გარემოს დაცვის საკითხთა კომიტეტის თავმჯდომარე ვახტანგ წულაძე.

სამმხრივი შეხვედრა წელს პირველად გაიმართა და მიზნად ისახავს ქვემო სილეზიის რეგიონულ პარლამენტს, ბრანდენბურგის ლანდტაგსა და აჭარის ავტონომიური რესპუბლიკის უმაღლეს საბჭოს შორის სამმხრივი სამუშაო ფორმატისა და სამომავლო თანამშრომლობის დეტალების განხილვას.

შეხვედრაზე მხარეებმა ერთობლივი პროექტების განხორციელების კონკრეტულ გეგმებზე ისაუბრეს, მათ შორის კულტურის, სპორტის, ტურიზმის, მედიცინისა და ახალგაზრდული გაცვლითი პროგრამების მიმართულებით. 2020 წლისთვის დაგეგმილია სამმხრივი ეკონომიკური ფორუმის ჩატარება, რომელშიც სამივე რეგიონის ეკონომიკური პოტენციალი იქნება წარმოდგენილი და ხელს შეუწყობს აჭარის პოპულარიზაციას და ბიზნეს კონტაქტების დამყარებას ევროპის წამყვან ქვეყნებთან. გარდა ამისა, რეგიონების საკანონმდებლო ხელისუფლების პირველმა პირებმა ტურიზმის მნიშვნელობაზეც გაამახვილეს ყურადღება. საუბარი შეეხო მომავალი წლისთვის სამმხრივი ტურისტული ფორუმის ორგანიზების დეტალებს და მოსალოდნელ შედეგებს.

შეხვედრა ქვემო სილეზიის რეგიონული პარლამენტის პრეზიდენტის, ანდჟეი იაროშის მასპინძლობით გაიმართა და მას ბრანდენბურგის ლანდტაგის პრეზიდენტი, ბრიტა შტარკი და აჭარის ავტონომიური რესპუბლიკის უმაღლესი საბჭოს თავმჯდომარე, დავით გაბაიძე დელეგაციებთან ერთად ესწრებოდნენ.

აჭარის უმაღლესი საბჭო დამეგობრებულია როგორც ბრანდენბურგის, ასევე, ქვემო სილეზიის რეგიონულ პარლამენტთან და აქტიურად თანამშრომლობს ორივე რეგიონის საკანონმდებლო უწყებასთან.