შუალედურ არჩევნებში ხულოს მერობისთვის "ქართული ოცნებიდან" ვახტან ბერიძე იბრძოლებს,- ამის შესახებ აჭარის მთავრობის თავმჯდომარე თორნიკე რიჟვაძემ ჟურნალისტებს განუცხადა.

მისი თქმით, „ქართულ ოცნებას" აჭარის რეგიონში ახალი სახეები შეუერთდებიან.

„ჩვენ აქტიურად ვემზადებით ხულოს მერის რიგგარეშე არჩევნებისთვის. რა თქმა უნდა, იქნება ახალი სისხლი და სახეები. რიგგარეშე არჩევნებში ვახტანგ ბერიძე იქნება ჩვენი კანდიდატურა“,- განაცხადა თორნიკე რიჟვაძემ.

ამ დროისათვის ხულოს მერის მოვალეობას ხულოში პოლიციის ყოფილი უფროსი ვახტანგ ბერიძე ასრულებს. ყოფილმა მერმა გოჩა მელაძემ თანამდებობა საკუთარი განცხადების საფუძველზე დატოვა.