იურიდიულ საკითხთა კომიტეტში დღეს უზენაესი სასამართლოს მოსამართლეობის კანდიდატების შერჩევისა და პარლამენტისათვის წარდგენის პროცედურასთან დაკავშირებით სამი კანონპროექტის კენჭისყრა იგეგმება.

როგორც იურიდიული კომიტეტის თავმჯდომარის მოადგილე დავით მათიკაშვილმა განაცხადა, მნიშვნელოვანია ვენეციის კომისიის ჩართულობა ამ პროცესში.

"იცით, რომ მის დასკვნასაც დაველოდებით ჩვენ და ადეკვატურად ვიმოქმედებთ. ასე რომ, კითხვებს „ქართული ოცნების“ მიერ წარდგენილ კანონპროექტთან მიმართებაში პასუხები გუშინ გაეცა. კარგად თუ მოხდება კანონპროექტის შესწავლა, ყველა მიხვდება, რომ საკითხი არის ძალიან კარგად დამუშავებული და ის პასუხობს ჩვენი საზოგადოების და ქვეყნის მოთხოვნებს, პრინციპებსა და ამოცანებს, რომლისთვისაც წარიმართა ეს ძალიან მნიშვნელოვანი პროცესი“, - განაცხადა დავით მათიკაშვილმა.

მისივე თქმით, მოსამართლეებთან დაკავშირებული „ევროპული საქართველოს" კანონპროექტი არის პოლიტიკურად მოტივირებული და ძირითად პრინციპებს უგულებელყოფს.

დეპუტატი ასევე გამოეხმაურა დეპუტატ ეკა ბესელიას ბრალდებას, რომ პარლამენტი შაბათ დღეს კანონპროექტის განხილვას ფორსირებულად ახდენს.

„ყველაფერი არის რეგლამენტის ფარგლებში. თითონ კანონპროექტის მიხედვით პროცესი არის მაქსიმალურად გამჭვირვალე და დროში ისეა გაწერილი, რომ ის ფორსირებულად და მოკლე ვადაში ფიზიკურად შეუძლებელია მიიღო. ასე რომ, რეგლამენტის შესაბამისად მოქმედებს იურიდიულ საკითხთა კომიტეტი“, - განაცხადა მათიკაშვილმა.