გამყოფ ხაზთან მდებარე სოფელ მუჟავას დამაკავშირებელი 12 კილომეტრიანი საავტომობილო გზის სამშენებლო სამუშაოები აქტიურად მიმდინარეობს. ამ ეტაპზე გზის საფარის პირველი ფენის დაგების სამუშაოები ხორციელდება.
როგორც „ინტერპრესნიუსს“ სამეგრელო-ზემო სვანეთის სახელმწიფო რწმუნებულის ადმინისტრაციიდან აცნობეს, გზასთან ერთად სანიაღვრე სისტემები, ე.წ გაბიონები, ეზოებში შესასვლელები მოეწყობა, მოხდება მდინარე ოლორის საავტომობილო ხიდის და 30 მილხიდის მშენებლობა-რეაბილიტაციაც. პროექტის ღირებულება 4 მილიონ ლარზე მეტია.
სამშენებლო სამუშაოების მიმდინარეობას ადგილზე სამეგრელო-ზემო სვანეთის სახელმწიფო რწმუნებული ალექსანდრე მოწერელია გაეცნო. გზის მშენებლობის პირობა სახელმწიფო რწმუნებულმა ადგილობრივებს სოფელში წინა ვიზიტის დროს მისცა.
სოფელ მუჟავას გზის რეაბილიტაციას საავტომობილო გზების დეპარტამენტი ახორციელებს, პროექტი მიმდინარე წლის შემოდგომაზე დასრულდება.