ბულვარის ადმინისტრაციასთან საპროტესტო აქცია მიმდინარეობს. აქციის მონაწილეები ბათუმის ბულვარში მოტოციკლებისა და კვადროციკლების გაქირავების აკრძალვას აპროტესტებენ.

ისინი ბათუმის ბულვარის ადმინისტრაციისგან ნებართვას ითხოვენ, რომ ზაფხულში მოტოციკლებისა და კვადროციკლების გაქირავება ბულვარის ტერიტორიაზე შეძლონ.

მათივე თქმით, აკრძალვის შესახებ გადაწყვეტილება ტელევიზიით გაიგეს და ბათუმის ბულვარის ადმინისტრაციას მათთვის არ უცნობებია.

„ჩვენ გამოვიტანეთ სესხები და ამით შევიძინეთ მოტოციკლები და კვადროციკლები. ვითხოვთ, რომ წელს მაინც მოგვეცეს საშუალება, რომ სესხები დავფაროთ. ჩვენ არც კი ვიცოდით, ისე მიიღო ბათუმის ბულვარის ადმინისტრაციამ ეს გადაწყვეტილება. ჩვენ ვთავაზობთ ბულვარის ადმინისტრაციას რამდენიმე პირობას, რომლის მიხედვითაც შემცირდება კვადროციკლებისა და მოტოციკლების გადაადგილება ბულვარში“, - განაცხადა აქციის ერთ-ერთმა მონაწილემ რევაზ სურმანიძემ.

შეგახსენებთ, რომ რამდენიმე დღის წინ ბათუმის საკრებულომ მიიღო გადაწყვეტილება 1-ლი მაისიდან აიკრძალოს მოტოციკლებისა და კვადროციკლების ბულვარში გადაადგილება. საკრებულოს წევრების განცხადებით, გადაწყვეტილება მოქალაქეების უსაფრთხო გადაადგილებას შეუწყობს ხელს.