საქსტატის წინასწარი შეფასებით, თებერვალში ეკონომიკა 4.6%-ით გაიზარდა

წინასწარი შეფასებით, 2019 წლის თებერვალში წინა წლის შესაბამის პერიოდთან შედარებით რეალური მთლიანი შიდა პროდუქტის ზრდამ 4.6% შეადგინა, ხოლო იანვარი-თებერვლის საშუალო რეალური ზრდა 4.1%-ით განისაზღვრა, - ამის შესახებ საქსტატის აღმასრულებელმა დირექტორმა გოგიტა თოდრაძემ დღეს გამართულ ბრიფინგზე განაცხადა.

მისივე თქმით, მიმდინარე წლის თებერვალში წლის შესაბამის პერიოდთან შედარებით ზრდა შეინიშნებოდა დამამუშავებელ მრეწველობაში, ვაჭრობაში, უძრავი ქონებით ოპერაციებისა და მომსახურებია გაწევის დარგში. ამასთან, კლების ტენდენცია კვლავ გრძელდება მშენებლობის დარგში.

„დამამუშავებელ მრეწველობაში ზრდა ძირითადად უკავშირდება, საკვები პროდუქტებისა და სასმელების მოცულობის, ასევე ქიმიური მრეწველობის წარმოების მოცულობის ზრდას, რაც დასტურდება იმ ფაქტით, რომ მაგალითად 31%-ით გაიზარდა ყურძნის ნატურალური ღვინის ექსპორტის მოცულობა, 36%-ით გაიზარდა მინერალური და მტკნარი წყლების ექსპორტი, 24%-ით გაიზარდა აზოტოვანი სასუქების ექსპორტის მაჩვენებელი. ამასთან, დამამუშავებელ მრეწველობაზე არსებით გავლენას ახდენს მეტალურგიულ მრეწველობაში განვითარებული მოვლენები. ამ მხრივ აღსანიშნავია, ფერო-სილიკო-მანგანუმის ექსპორტის 57%-იანი ზრდა. უძრავი ქონებით ოპერაციებს რაც შეეხება, ზრდა უკავშირდება ამ დარგის საწარმოების მომსახურებაზე გაზრდილ მოთხოვნას. განსაკუთრებით აღსანიშნავია უძრავი ქონების გასაყიდად მომზადების, ასევე იჯარის გაცემასთან დაკავშირებული კომპანიების ბრუნვის მოცულობის ზრდა. ვაჭრობის დარგში ზრდა ძირითადად განპირობებულია ბუნებრივი აირის, ასევე ნავთობის და ნავთობპროდუქტების იმპორტის მაჩვენებლის ზრდით. აღსანიშნავია, რომ 35%-ითაა გაზრდილია რეექსპორტის მაჩვენებელი. ტურისტული ვიზიტების რაოდენობა კი დაახლოებით 5%-ით გაიზარდა, რაც ვაჭრობის დარგში ბრუნვის მაღალ მაჩვენებელს განაპირობებს. რაც შეეხება მშენებლობის დარგში კლების ტენდენციას, ეს უკავშირდება სამშენებლო პროექტების მოცულობის შემცირებას, ძირითადად შენობების საერთო მშენებლობის, მაგისტრალური მილსადენების, კავშირგაბმულობის და ელექტროგადამცემი ხაზების მშენებლობის მიმართულებით,"-განაცხადა გოგიტა თოდრაძემ.

ცნობისთვის, საქსტატი ყოველთვიურად აწარმოებს ეკონომიკის ზრდის ყოველთვიურ წინასწარ შეფასებებს, რომელიც იანგარიშება უწყებრივი სტატისტიკის (დღგ-ის გადამხდელი საწარმოების ბრუნვების, ფისკალური და მონეტარული მონაცემების) საფუძველზე. აღნიშნული შეფასებები წარმოადგენს საერთაშორისოდ მიღებულ პრაქტიკას, რომელსაც იყენებენ მოკლევადიანი წინასწარი ოპერატიული მონაცემების მისაღებად. იმ სფეროებში, სადაც ყოველთვიური მონაცემები (მაგალითად, სოფლის მეურნეობა, დაუკვირვებადი ეკონომიკის მოცულობა) არ მოიპოვება, შეფასება გაკეთებულია წინა პერიოდის მონაცემებზე დაყრდნობით. გარდა ამისა, ყოველთვიურად შესაძლებელია მოხდეს წინა თვეების დღგ-ის გადამხდელი საწარმოების ბრუნვების კორექტირება, რაც, შესაბამისად, რეალური ზრდის ყოველთვიური წინასწარი შეფასების მონაცემის კორექტირებასაც იწვევს.

ამირან სალუქვაძე - მიუღებელი რეალობაა - ხელისუფლებას და ოპოზიციას ერთმანეთი აწყობთ
ქართული პრესის მიმოხილვა 25.05.2020
ნათია თურნავა - ყველა წინაპირობაა, რომ 2021 წელი წარმატებული წელი იყოს
თემურ ჩუბინიძე - ჩვენი მეშახტეები გმირები არიან
Wolt - კვლავ ღამის 3 საათამდე