ქარელის რაიონში, სოფელ ბრეთში, ოჯახში, სადაც დღეს დილით 2 წლის ბავშვი გარდაიცვალა, კიდევ ერთ მცირეწლოვანს პნევმონია დაუდგინდა.
3 წლამდე ასაკის გოგონა „გორმედის“ ქსელის ქარელის საავადმყოფოში ცოტა ხნის წინ გადაიყვანეს. ჩატარებული კვლევებით დადგინდა, რომ ბავშვს პნევმონია აქვს.
„გოგონას კლინიკაში ყველა საჭირო გამოკვლევა ჩაუტარდა და პნევმონიის დიაგნოზი დაუდგინდა. უტარდება შესაბამისი მკურნალობა. სტაციონარში მკურნალობას გადის ამ ბავშვის ძმაც, რომელიც ბრონქიტის დიაგნოზითაა მოთავსებული. რაც შეეხება გარდაცვლილ ბავშვს, იგი ექიმთან კონსულტაციაზე მშობლებს არ ჰყოლიათ. ბებიის თქმით, რამდენიმე დღის განმავლობაში ბავშვს ხველა, გრიპი და ტემპერატურის მომატება აღენიშნებოდა“, - განაცხადა ,,ინტერპრესნიუსთან“ საუბრისას ,,გორმედის“ ქსელის ქარელის საავადმყოფოს პედიატრმა ლია გოჩაშვილმა.