ბათუმის საქალაქო სასამართლოსთან „ქურდულ სამყაროს“ წევრობაში ბრალდებულის ზაალ ახვლედიანის ოჯახის წევრებმა და უფლებადამცველებმა საპროტესტო აქცია გამართეს.

როგორც აქციის მონაწილეებმა განაცხადეს, ისინი საქმის განხილვაში მოსამართლე ლევან გელოვანის აცილებას მოითხოვენ.

მათი თქმით, ბრალდებული 8 თვეა ციხეში იმყოფება და ამ ხნის განმავლობაში დაცვის მხარე სასამართლო მტკიცებულებათა გამოკვლევის საშუალებას არ ძლევს.

ბრალდებულის ადვოკატები ამბობენ, რომ დაცვის მხარე არათანაბარ პირობებში იმყოფება.

მათივე თქმით, არაერთ სასამართლო პროცესზე დააყენეს მოსამართლის აცილების თაობაზე შუამდგომლობა, თუმცა უარი მიიღეს.

ადვოკატი ფრიდონ სიხუაშვილი აცხადებს, რომ საქმეში არსებულ მტკიცებულებებს საგამოძიებო ორგანო 8 თვის განმავლობაში იკვლევდა, ხოლო დაცვის მხარეს სასამართლომ მტკიცებულებათა გამოსაკვლევად რამდენიმე დღე მისცა.

ადვოკატი მიიჩნევს, რომ ეს არის არათანაბარ პირობებში მუშაობა.