"მშრომელი ადამიანი საფრთხეშია", - ამ ლოზუნგით ბათუმში ევროპის მოედანზე სამოქალაქო საზოგადოების წევრებმა და სტუდენტებმა აქცია გამართეს და თბილისში მშენებლობაზე დაღუპული მუშების ოჯახის წევრებს სამძიმარი გამოუცხადეს.
შეკრებილებმა ქვეყანაში შრომითი უსაფრთხოების ნორმების დაუცველობა კიდევ ერთხელ გააპროტესტეს და ხელისუფლებას მკაცრი ღონისძიებების გატარება სთხოვეს. მათი თქმით, შრომითი ინსპექცია უნდა გააქტიურდეს.
"პარლამენტარები თუ მთავრობის წარმომადგენლები იმდენად კომფორტულ პირობებში ცხოვრობენ, ვერც კი წარმოუდგენიათ რა პირობებში უწევთ მუშაობა და ოჯახის რჩენა მუშებს, უნდა გამოფხიზლდეს ყველა, "-ამბობს სტუდენტი მარიამ მუთიძე.