სოფელ წყალწმინდაში მომხდარი ავტოსაგზაო შემთხვევის შედეგად დაშავებულები ფოთის ჰოსპიტალში არიან მოთავსებულები. ჰოსპიტალის დირექტორის, თეა მიგინეიშვილის თქმით, მათი მდგომარეობა სტაბილურია.

„ავტოსაგზაო შემთხვევიდან 112-ის ბრიგადამ 2 პაციენტი შემოიყვანა, 37 წლის და 35 წლის მამაკაცები. მათ შორის ერთი საქართველოს მოქალაქე არ არის. ისინი იმყოფებიან მიმღებ - დიაგნოსტიკურ განყოფილებაში, აღენიშნებათ მრავლობითი ტრავმული დაზიანებები, დაჟეჟილობები. უტარდებათ ყველა საჭირო კვლევა და მკურნალობა“, - განუცხადა „ინტერპრესნიუსს“ ფოთის ჰოსპიტალის დირექტორმა თეა მიგინეიშვილმა.

ლანჩხუთის მუნიციპალიტეტის სოფელ წყალწმინდაში მომხდარი ავარიის შედეგად ერთი ადამიანი გარდაიცვალა, ორი კი დაშავდა.

მომხდარ ფაქტზე შსს-მ გამოძიება სისხლის სამართლის კოდექსის 276-ე მუხლის მე-6 ნაწილით დაიწყო, რაც ტრანსპორტის მოძრაობის ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.