„ქურდული სამყაროს“ წევრობის ბრალდებით დაკავებულების პროცესის დაწყებამდე, ბათუმის საქალაქო სასამართლოსთან აქცია მიმდინარეობს
„ქურდული სამყაროს“ წევრობასა და კავშირში ბრალდებულების - იმედა აბაშიძის, მარად წითელაძის, ჯამბულ ნაკაშიძისა და ბეჟან დეკანაძის განაჩენს ბათუმის საქალაქო სასამართლო დღეს გამოიტანს.
პროცესის დაწყებამდე ერთ-ერთი ბრალდებულის, იმედა აბაშიძის ოჯახი ბათუმის საქალაქო სასამართლოსთან აქციას მართავს. როგორც შეკრებილები აცხადებენ, ბრალდებულს ჯანმრთელობის პრობლემები აქვს და ასევე მის წინააღმდეგ არანაირი მტკიცებულებები არ არსებობს.
„ჩვენ გვჯერა მართლმსაჯულების და დიდი იმედი გვაქვს, მოსამართლე გამამართლებელ განაჩენს გამოიტანს. რვა თვეა მიმდინარეობს პროცესი და ვერც ერთი რეალური მტკიცებულება ვერ წარმოადგინა ბრალდებამ, იმედი მაქვს, მოსამართლე იმედა აბაშიძის ჯანმრთელობის მძიმე მდგომარეობასაც გაითვალისწინებს“, - ამბობს ბრალდებულის მეუღლე ნინო აბაშიძე.
